吾是一个土生土长个上海人，近抢把、勒拉吾所在城市各大媒体侪勒竞相报道迭能一桩事体，讲申城连续高温个辰光已经达十天！今早仔只要一到天气炎热个夏季，每户人家侪会开着空调，也覅愿意外出去锻炼身体，就连跳广场舞个人也几乎呒没，勒屋里交关惬意个孵着空调畀侬搭吾带唻个阵阵凉意。“孵”字个普通话读音为fū，畀过，就勒拉吾个城市上海市，还勒拉上海闲话当中读音就为“bú”。
“辰光”个迭部列车，至少也要倒回到20世纪90年代个初中期前头，为啥就要倒回到迭个辰光段里向去呢？！侪是因为勒拉掰搿辰光，中国人还呒没畀“空调”迭种家庭用品去发明出唻，还当“空调”呒没广泛个普及并进入到千家万户前头，对于上海人唻讲伐，只要是一到天气炎热个夏季里向，顶顶欢喜做个一桩事体会是啥么事呢？！迭桩事体就是－－“乘风凉”，“乘风凉”迭个词语就是一句上海方言俚语闲话，伊畀翻译成为普通闲话，伊个意思是讲“纳凉”。
勒20世纪90年代个初中期前头，上海人一直侪是有迭能一种习惯，勒炎热个夏季，每户人家侪要跑到外头去乘风凉，故而上海人发明一句方言俚（俗）语，讲道：“六月蚊子嗡嗡叫，搬着板凳乘风凉！”而且勒热天到外头“乘风凉”，是老上海人独有个一道风景线，迭道风景线保持邪气长个一段辰光，顶起码也要拥有二三十年左右个光景，偶尔勒电视台还会去播放各类老上海故事个纪录片，其中就有老底子老一辈个上海人，哪能勒天气邪气炎热个夏天，乘风凉个故事。
像“乘风凉”一词又是哪能而唻个呢？！最早出自清代一介布衣顾禄撰写个《清嘉录》一书中，伊勒《清嘉录·六月·乘风凉》写有迭能一大段个文字，曰：“纳凉，谓之乘风凉。或泊舟胥门万年桥洞，或舣棹虎阜十字洋边，或分集琳宫、梵宇、水窗、冰榭，随意流连。作牙牌、叶格、马吊诸戏，以为酒食东道，谓之斗牌。习清唱为避暑计者，白堤青舫，争相斗典，夜以继日，谓之曲局。或招盲女、瞽男弹唱新声绮调，明目男子演说古今小说，谓之说书，置酒属客，递为消暑之宴。盖此时铄石流金，无可消遣，借乘凉为行乐也。”
到夜快头五至六点钟以后，尤其是住勒市区里向个人，覅管是勒各条弄堂口、还是勒马路边浪向，就会得展现出迭能一幅场景唻，覅管有多少男女老少，大家侪会早早个去抢好地皮、划好一块势力范围，占领最有利个地理位置，摆起躺椅、竹椅、木板凳等各类物品，就勒其中，躺椅个材质就有：篾竹躺椅、帆布躺椅、竹榻；木板凳高矮长短各覅同；只要是一喫好夜饭以后，街坊邻里，一边摇着蒲扇，一边开始嘎讪胡谈山海经，有些人勒听无线电，还有些人勒看新民晚报，还有覅少个老中青年人搭小朋友，会打起各类扑克牌、玩“象棋”“陆战棋四国大战”等游戏，另外还有些人会躺勒躺椅上头打磕冲。
勒空气当中，能闻到“痱子粉”搭“花露水”个味道，可以讲基本浪向整个城市里向侪是迭个味道，伊形成夏日申城一种独有个城市气息，更能显现老底子上海市老百姓对生活中个一种无可奈何！
勒拉掰搿辰光为啥覅待勒屋里，而是要到外头去乘风凉啊？！侪是因为勒老底子个辰光，住勒市区里个人，住房条件侪是邪气推扳困难个，祖孙三代共同挤勒建筑面积为十几个平方米，20个平方米覅到，可以讲是比比皆是个，甚至于比十几个平方米还要推扳个人家，还有得交关多个，一年四季当中，只有春秋冬三季日脚邪气好过，夏天交关难过，勒屋里就好像是一只大个蒸笼，搭今早仔高档个洗浴室，蒸桑拿是差覅多个，是呒没办法睏好觉个，也只好到外头乘风凉！
勒上海闲话当中，“乘风凉”中个“乘”字搭“乘车子”当中个“乘”就是一个意思，就好比讲勒凉气里向蹲一阵子。尤其是勒拉市区里向，既然大家侪是唻乘风凉个，嘎么，迭个“风”字就是顶要紧个，尤其是“穿堂风”，如果呒没“穿堂风”，“乘风凉”就是属于呒没意思个一桩事体。迭个“穿堂风”个风口，往往就勒拉每户人家家门口个弄堂口，还有三块地方，大马路、人行道搭街心花园。
讲到“穿堂风”让吾想到，勒上海拥有六块顶有名个“穿堂风”，伊拉分别就是：第一块南京西路搭黄河路交叉口穿堂风；第二块国际饭店周围个穿堂风；第三块黄河路穿堂风；第四块凤阳路穿堂风；第五块长沙路穿堂风，第六块就是北京东（西）路老房子穿堂风。
吾勒上头个文字当中，一直勒提及“穿堂风”迭个词语，伊到底又是勒拉讲啥么事呢？！“穿堂风”又畀称为“过堂风”，伊是一种专门流动于建筑物内部空间个一种风。勒“风压”个作用下头，室外个空气会从建筑物一侧进入，然后贯穿内部，再从另一侧流出。
有一点也是要讲清爽个，上海人还交关欢喜南北通风个房子，到热天季节，要是外头风口大，一股风压压较吹进唻，从南边个窗口吹进唻，往北面个窗口吹出去，就像是一个匆忙而过个不速之客。迭个辰光，心里会有一种讲覅出个惬意感，而且最好一直侪是迭能。
勒乘风凉前头，上海人还会先做一桩事体，会勒地面上头浇浇水，正所谓“前人浇水，后人乘凉！”凡是地面畀浇过水个地方，温度也可以降低一两度左右，浇水绝对是先头部队，通常是第一户人家浇过以后，后面个几户人家自然就会跟着一道唻浇水个。勒拉掰搿辰光（年代）大家侪是用公用水表，水费要侪是计算到每户人家当中，假使每天浇几桶自唻水还是交关奢侈，所以勒多数辰光会用汏浴水浇。
勒夏季，有些居住勒拉市区石库门房子里向个人家，等浇好水以后，还会搬出桌子、椅子以及各种饭菜到天井里向，一边乘着风凉，一边吃着夜饭。还有些邻舍隔壁关系邪气好个，彼此之间相处得交关融洽个人家，相互间还会讲好个，今早吾伲两户人家拼勒一道，各自去烧几道邪气拿手个小菜，一道聚会尝味道、嘎讪胡谈山海经。
勒拉20世纪90年代个初中期前头，每户人家个经济条件基本浪向侪是属于差大覅多个，也可以讲是不相上下，既呒没啥个空调个，也是呒没啥个冰箱，每当到天气炎热个夏季，除忒夜快头会去弄堂口、马路边浪向乘风凉、嘎讪胡谈山海经以外，还会去喫喫各种冰镇个啤酒、饮料搭西瓜，覅管是住勒市区里向个人，还是住勒郊区里向个人，只要勒屋里附近有一口井水，勒喫之前个两三个钟头，会畀啤酒、饮料搭西瓜一道放进拎井水个铅桶里向，再畀迭眼么事放置到井水个里向让井水浸一浸，等到辰光一到再畀伊拿出唻，就好像勒喫冰镇个啤酒、饮料搭西瓜一样，实际浪向每一口井水侪是冬暖夏凉，勒夏天井水搭电冰箱工作原理是差覅多个，侪能畀人带来丝丝个凉意……
老底子个古人，一到夏季，就会穿绞经有孔个“丝绸单罗”“纱衣类”衣裳，“纱衣”是掰搿辰光高档个衣裳，分三个种类，分别是“实地纱”“芝地纱”“亮地纱”，比方讲：唐朝香山居士白居易搭同时代个工部侍郎元稹是好友，担心元稹待勒通州过热，曾寄一套轻纱生衣畀元稹。覅仅是迭能，伊还创作一首诗，讲道：“犹恐通州热杀君，莫嫌轻薄但知著。纺花纱裤薄于云，浅色縠衫轻似雾。”
老底子，夏天乘风凉个辰光，防暑就是顶重要个一桩事体。
对男人唻讲，覅管老中青少，是覅讲究个，就是一个“脱”字，脱到覅能再脱、脱到赤膊为止，下身只穿一条平脚裤或乒乓裤。
女性也是覅讲究个，畀过要比男人麻烦许多，一些中老年妇女一般只穿一件轻薄上衣，经济条件好一眼个人家，会去穿“香芸纱”衣裳，一些经济条件推扳个人家，就只好穿蹩脚一眼个“士林布”衣裳。衣裳个样式，覅是穿“中式大襟”衣裳，就是穿掰搿辰光交关流行个“方领套衫”，“方领套衫”又畀叫做“无袖一字领”，伊个领口是邪气高，臂膊侪是露勒外头，而且还会有时隐时现个暴露点。年轻一眼个小姑娘，总归是有一眼覅好意思怕难为情，勒衣裳里向会先穿一件汗衫或者汗马甲，稍许能遮挡一下。虽说仍旧还有凸点，但覅是邪气明显个。 女性下身穿得顶多就是花短裤，而且是五颜六色个。有得覅少个当家人，经济条件是邪气一般个，侪会得精打细算做人家，就为节省布料，畀花短裤裁剪得尽量短，和当下个热裤有得一拼！
就算到夏日时节，照样有得一对对男女青年朋友，会勒马路浪向兜马路、轧朋友，两人还会边走边聊，一路要走到黄浦江边外滩，掰搿辰光浦西黄浦江有一条长长个防汛堤坝，男女双方倚勒栏杆浪向谈恋爱，栏杆畀围得水泄覅通人轧人，变成为一垛人墙，上海人畀这垛墙叫做“情人墙”，中外闻名，伊就见证许多青年男女个爱情！
乘风凉个辰光，嘎讪胡是覅可缺少个一项活动，邻舍隔壁之间会分享各种趣闻轶事，还有覅少人家会张家短李家长，会畀人家屋里向某些丑事讲出唻，因为侪是老百姓个缘故，讲闲话或勒嘎讪胡个辰光，多多少少是有那么一眼眼个覅管覅顾，啥个闲话侪会讲出唻个。
最后，大多数家庭到半夜个辰光，大家纷纷散伙，就勒散伙前头，相互之间会讲一句闲话：“（大家）侪早一眼回去睏觉吧，明早还要去上班读书哩！”生活就是迭能样子个，一天又一天还会继续。
既然是讲到有关于乘风凉迭桩事体，还有如下个两桩事体是令吾至今为止侪是难以去忘记忒个，不妨就让吾也拿出唻讲一讲伐！
第一桩事体就是：吾个邻居汪世洋搭蒯红妹夫妻是吾亲大哥陆明个过房爷过房娘，尽管过房爷是石化系统个普通员工，过房娘是高级点心师，每年还有订《新民晚报》个好习惯，就勒那些乘风凉个日脚里向，伊拉夫妻两人，除忒会搭周围个邻居嘎讪胡以外，还会阅读《新民晚报》个，搭周围个邻居们一道去分享报纸当中个趣闻轶事。
第尼桩事体就是：就勒吾交关多个同学中，吾曾经有一位名字叫“徐涛”个同学，伊还是吾个邻居，伊爷个名字搭上海足坛教父徐根宝是一模一样个，徐涛就是迭能样子个人，侪因为伊长得活脱似像就像一个外国佬，而伊个爷娘并覅是外国人，侪会调侃迭户人家！为啥会得迭能呢？！侪因为徐涛勒小学个辰光，头发侪是金黄色个，一双眼睛也像波斯猫个眼睛是差覅大多个，也是一蓝一黄个。周围个邻居每趟勒乘风凉个辰光看到伊拉，会得调侃讲徐涛并覅是伊个爷搭伊个娘生出唻个，而是伊个娘搭外国人生出唻个，要覅然就覅会长成迭能样子，而且有调侃过好几趟好几年，伊拉一家总是笑而覅语……
当“辰光”迭部列车走到今早仔，虽说现在上海人个生活方式，要是畀老底子拿出唻做一个对比搭比较，就可以讲已经大变样、变得面目全非，每户人家纷纷搬进新工房、住进各式各样个小区里向，上海人再也覅会到外头去乘风凉！上海人勒热天乘风凉个习俗（惯），就好像各类风俗年画一样，正在逐步个褪颜色、渐渐个渐行渐远！
还虽讲是迭能，畀过，吾自家对于迭种习俗（惯），倒是多多少少还是有那么一眼眼个怀念。覅管老底子上海，普通老百姓个日脚是哪能个清苦，会充满着多少个甜酸苦辣、开心搭欢声笑语……毕竟是属于老底子上海人一段难以磨灭个记忆，勒火热中又带有风凉……
【备注：①：文章为作者原创；②：各种老上海人乘风凉图片侪是唻源于网络上头；③：万分感谢原创图片。】
杜老倌侠客居（陆伟）写于2018年08月09日礼拜四夜里向
