吾出生于20世纪70年代个末期，畀大家称之为“70后”，勒拉吾个小辰光，也就是勒拉少年时期，尽管每家每户个经济条件覅是顶顶好个，基本浪向僎是差大覅多个，对于小囡囡头唻讲，空闲辰光娱乐远覅如今早仔唻得丰富多彩，但畀过有得交关好白相个游戏。

        勒拉其中有得一项游戏就叫做－－“跳橡皮筋”。勒拉老长个一段辰光里向，大多数人侪会得一致去认为，迭种游戏专门是一些女小囡去白相相个室外游戏，是伊拉“独有个专利”，绝对是有助于伊拉个身心搭健康，如果讲，一些男小囡也勒拉白相迭种游戏，就会得觉着覅大对头勒，多多少少有得一眼眼娘娘腔，就覅像一个男人。

        吾还能够清爽个去记得，就勒拉吾个小辰光，跳橡皮筋个材质搭材料是有得两种个，第一种就是用松（宽）紧带；第尼种就是用一根根牛筋橡皮筋串连起唻；一些经济条件稍许好一眼个人家，宁肯用牛筋橡皮筋，为啥啊？！因为牛筋橡皮筋相对而言邪气牢固，可以使用交关长，覅像其他材质个橡皮筋，使用辰光交关短，容易断忒。

        跳橡皮筋个辰光，嘴巴里向还有口诀，讲：“马莲花开二十一；二五六，二五七，二八二九三十一；三五六，三五七，三八三九四十一”……迭种口诀呒没道理好讲个，为个就是读起唻朗朗上口。

        勒拉掰搿辰光，跳橡皮筋也是要去讲究季节性个，勒拉一般情况下头，秋冬季节跳橡皮筋就跳得邪气多勒。跳橡皮筋个辰光，既可以从低跳到高，也可以从高跳到低，顶顶高，橡皮筋还可以放到头筋骨处，一些女小囡还会得去编排各式各样个花样经搭各种动作哦。

        每趟仔要跳橡皮筋个辰光，小朋友们自会得自觉自愿早早个先畀各项功课去做做好。既覅管是住勒拉一条弄堂里向个；也覅管是住勒拉新工房房子里向个；还是住勒拉私房里向个；是会得呼朋引伴三五成群个大声叫嚷道：“大家一道出唻跳橡皮筋啊，有啥人愿意搭吾一道去跳跳橡皮筋伐？！”覅单单是迭恁样子，有些小朋友还会得事先就约定好，假使今早仔个各项功课覅是交关多个，嘎么就赶快仔先畀功课去做忒伊，等做好功课以后，就好去白相跳橡皮筋游戏勒。

        勒拉吾个小辰光、尤其是勒拉读小学个辰光，同样也是会得搭女小囡一道去跳橡皮筋个，只畀过，由于吾就是属于愚笨个人，勒拉掰搿辰光跳唻跳去，只会得去跳一套动作，名字叫“开机关枪”。

        勒拉掰搿辰光，覅光光就是吾自家哦，还有得交交关关多个男小囡，也会得搭一帮子女小囡去跳跳橡皮筋唻，顶顶主要个原因有得两种。第一种就是：通过跳橡皮筋，可以增进小朋友之间个友情搭情谊；第尼种就是，勒拉冬天季节里向，通过跳橡皮筋，去抵御寒冷。

        就是覅晓得啥个道理，勒拉掰搿辰光、还勒拉吾读小学个辰光，只要一到冬天季节里向，天气就会变得邪气冷飕飕个，勒拉教室里向上课，就算吾身浪向穿有四件马海毛个绒线衫，还是会得觉着浑身上下侪是有一眼眼冷飕飕个，人也会得微微去发抖。勒拉掰搿辰光覅像今早仔哦，侪是呒没啥空调个，唯一个希望就是－－能够早一眼眼下课，课间好休息十分钟唻，勒拉上另外一节课之前，通过去跳跳橡皮筋，就好唻取取暖，迭恁样子去做，还有利于去上下一节课程。

        吾依旧能够清爽个去记得，勒拉吾读小学三年级个辰光，唻勒一位从师范中专毕业名叫王一清个先生（女），伊是专门教授国文课程个，做过吾班级个实习国文班主任。只要一到冬天季节里向，伊看到班级里向有一些女生覅愿意男小囡搭伊拉一道去跳橡皮筋，还开口去讲道：“男小囡覅仅仅僎是老面皮，而且还侪是娘娘腔哦，简直就覅像一个男人，好死开跑开勒，吾伲就覅愿意搭侬一道跳橡皮筋！”……就对女生们唻教育一番，还讲同学之间要互帮互助相互友爱，天气邪气冷，跳跳橡皮筋好取暖，男小囡也一样搭女小囡好跳橡皮筋个！……

        当辰光走到今早仔，现在个男小囡搭女小囡，恐怕就覅大会得再去跳跳啥个橡皮筋游戏勒，之所以会变得迭能样子，就我看唻也是属于至少拥有如下个、两种最为主要个原因哦。原因之一就是：能够提供小朋友跳橡皮筋个场地，可以讲变得越来越少；原因之尼就是：现在做功课压力山大，每天作业又是邪气多个，还唻覅急去做唻。

        今早仔再回想起小辰光跳橡皮筋游戏，觉着还是蛮有趣个！

      【备注：①：文章为作者原创；②：各种跳橡皮类图片侪是唻源于网络上头；③：万分感谢原创图片。】

        杜老倌侠客居（陆伟）写于2018年07月17日礼拜二夜里向