个人勒拉每日个俗常生活中，衣食住行侪是离覅开“钱”个，今早仔科技已变得邪气发达，智能手机也畀广泛普及，吾伲身浪向可以覅带一分钱，只要拥有一部智能手机搭网络，就好去扫码支付。
勒拉20世纪90年代初中期前头，却并覅是迭能样子个，科技还覅是邪气发达个，还呒没啥个智能手机，每户人家拥有私人电话也是邪气少个，只要是走出勒屋里向，身浪向多多少少侪是要带一眼眼“钱”唻以防万一，为个是生怕勒末生头有需要去使用“钱”个地方。
勒拉老底子个辰光，勒拉通常情况下头唻讲伐，像“钞票”迭个词眼就是指“钱”，而且“钞票”迭个词眼，伊顶顶主要还是指纸币，伊个名称，覅是畀老百姓叫作“纸币”，就是畀老百姓叫作“钞”，顶顶早个辰光就是勒拉历史浪向金贞元二年发行个“交钞”，凡是“交钞”个面额达到100文到700文之间个，侪是畀叫作“小钞”，伊是搭铸币同时使用个。自从清朝政府发行“大清宝钞”搭“户部官票”以后，两者之间合并起唻叫作“票钞”或“钞票”。从此以后，“钞票”迭个词眼侪畀老百姓泛指为各种面额个纸币搭银行券。到清朝中后期以后，就勒拉俗语当中，“付钱”就畀叫作“会钞”。
吾是一个土生土长个上海人，上海人对于“钱”迭个词眼是有得交关多个讲法唻。老一辈个上海人侪是欢喜畀“钱”迭个词眼叫作“铜钿”，像迭个词眼个上海方言闲话读音个注音就是：【dondie】，“钿”迭个词眼，伊原本所要指个意思就是勒讲：凡是属于邪气珍贵个金银珠宝首饰。上海个语言也同样是属于吴语方言体系个，然而，勒吴语方言体系当中，或者讲，勒上海个方言俚语词语当中，伊个含义就是指那些畀泛指为由金属制作而成个、各种面值个货币。覅仅是迭能哦，对老底子老一辈个上海人唻讲伐，上海人每趟勒购买各种么事或各种商品个辰光，经常性会得开口去讲迭能一句闲话哦，曰：“迭样么事要几钿啊？！”或者又会说：“迭样么事（商品）到底需要多少铜钿侪好买伊啊？！”迭两句沪语方言闲话个意思是讲，吾需要支付多少铜钿以后，侪能够去购买迭样么事或迭样商品啊？！……
吾还要讲个一句闲话就是，勒上海有一个方言俚语词眼叫做“煞根”，伊个含义就是指“极致到顶”“极致得覅能再极致”个意思，迭个词眼是英文“Shocking”演化而唻个。还或者，顾客会采用沪语方言对营业员唻讲道：“迭样么事（迭样商品），煞根价到底是几钿吾好拿勒就跑啊？！”迭句话个意思是讲：最低啥价钿吾能拿走伊。
勒吾伲国家古代个辰光，对于绝大多数个普通老百姓唻讲伐，能够获得一大笔钱，覅管迭笔钱，是银子（票），还是铜钱，侪是属于交关覅容易个一桩事体，依旧是对于绝大多数个普通老百姓唻讲伐，顶多只好待勒自家屋里向去数数那些小面额个铜钱，也正因为是迭能样子个，从而就造成“铜钿”迭个词眼就应运而生，虽说“铜钿”伊原本个意思就是勒讲“铜制个钱币”，勒吴语方言闲话体系当中，尤其是上海人，覅管是各种面值个“纸币钱”，还是其他材质个钱币，侪是畀叫作“铜钿”个，“铜钿”就等同于各式各样个钱币。“铜钿”迭个词眼是属于邪气老派个，到勒今早仔，只有上勒年纪、至少岁数勒七八十岁个老爷叔搭老阿奶们，侪会得去讲讲个，恐怕对于今早仔个年轻人，覅仅是覅会得去讲讲个，还覅一定会晓得迭个词眼。
勒老底子个辰光，自从古人发明“铜钿”迭个词眼以后，到上海迭座城市，上海人勒讲“铜钿”个辰光，老一辈个上海人，还交关欢喜勒“铜钿”个后头去添加“银子”迭个词眼，从而就演变成为“铜钿银子”，还因为自从拥有“铜钿银子”迭个词眼以后，经过历史个变迁搭发展，还有去发明如下个三句俗语闲话句子，迭个三句俗语闲话分别就是：“铜钿银子关心境”“铜钿银子性命交关”“铜钿银子压煞人”。据吾所了解到个情况，覅仅是上海人会去讲讲迭句俗语“铜钿银子关心境”话语个，就连江苏苏州地区个人，也同样是会去讲讲迭句俗语闲话个，还因为上海是属于一座移民搭五方杂处个城市，像迭句闲话就是从苏州地区流传到上海个。像迭能个三句闲话伊所要表达个意思搭含义会是啥么事？！按照今早仔个一种讲法，顶主要还是有如下个两层意思，第一就是说：某个人或某户人家有邪气多个铜钿；第尼就是讲：铜钿覅是万能个，要是呒没铜钿却是万万覅能个！
当中国由半封建半殖民地跨入到近（现）代化社会个全过程中，同样是会拥有各种面值个硬币，起先发明个就是“铜钿”迭个词眼，到后唻又去发明“洋钿”迭个词眼，迭两个词眼，覅仅是属于具有历史方面个意义，而且还充满着时代方面个气息，真个可以讲是两者兼而有之个。勒上海迭座城市个历史浪，当时光迭部列车驶入到“中华民国时期”以后，但凡是从外国引进到中国唻个各种物品搭商品，上海人就是欢喜勒各种物品搭商品个前头去添加迭个“洋”字个。
比方讲：勒老底子个辰光，下雨天撑个伞，顶早侪是畀叫做“油纸伞”个，自从由外国引进到上海滩浪、那些新式轻便个、下雨天撑个伞就畀叫作“洋伞”；喫香烟烧饭所要去使用个新式火柴畀叫作“洋火”；勒老底子个辰光，中国人则是呒没啥个电灯个，到夜快头以后，但凡是照明所使用个油，就畀上海人叫作“洋油”；凡是种种真可谓是举不胜举个，要是再去举例说明，还是能寻到交关多个。勒上海方言闲话当中，覅管是何种类型个词眼，只要是勒词眼个前头，去添加一个“洋”字以后，迭件物品肯定就是从外国引进唻个。
像“洋钿”迭个词眼也是覅好去例外个，伊也同样是迭能样子个！就勒晚清民国时期，伴随着西方列强唻到中国搭上海迭座城市以后，有大批量个外国“银元”流入到中国搭上海迭座城市。顺大便要去讲清爽个一桩事体就是－－货币“银元”是由外国人率先发明出唻个，“银元”起源于15世纪个欧洲，一到中国以后，就畀中国老百姓俗称为“洋钿”搭“大洋”，迭个是对“银铸币”个一种统称。然而，上海人顶欢喜叫作“洋钿”迭个词眼，还因为“洋钿”侪是由银子（元素）去铸造而成个，所以上海人交关欢喜勒词眼“洋钿”个前头，去添加一个“银”字，叫作“银洋钿”。因为吾爱好收藏各种钱币个缘故，还特特惠惠去查阅过覅少银币方面个史料。根据历史资料个显示，到晚清宣统二年个辰光，即：公元1910年，调查统计以后得出迭能一个结论唻，就勒迭个一年个里向，所流通个各种中外银圆，大约摸就拥有十一亿枚之多，而且勒其中尤其是以“墨西哥鹰洋”是唻得邪气居多个，“墨西哥鹰洋”就要去占据到全中国三分之一个份额。
历史个车轮到“中华民国时期”个辰光，中国国家也向外国国家学习，同样也是去建立银本位个货币制度，银圆从此以后就成为最为主要个流通货币之一。凡是由外国流通到中国唻个，而且还是由银子铸造而成个、各式各样个银币，侪是畀掰搿辰光个老百姓叫作“银洋钿”。实际浪向到晚清时期，也同样是去铸造有银币个，顶早铸造银币个辰光勒拉“清光绪”时期，伊个名称就叫作“光绪元宝”，到“中华民国”以后，还铸造过以“袁世凯”搭“孙中山”为头像个“银币”，只为表示搭外国银币是有所区别个，凡是银币上面拥有“袁世凯”搭“孙中山”为头像个各种银币，分别就畀上海老百姓叫作“袁大头”搭“孙大头”，老百姓就覅去使用“银洋钿”迭个词眼。
自从中国人或上海人去发明“洋钿”搭“银洋钿”两组词眼以后，辰光一长久而久之长此以往下去，勒老底子个辰光，辰光至少也要勒20世纪90年代初中期个前头，勒上海人每日个俗常生活中，对于钞票个数量单位唻讲伐，虽说勒钞票个上头印有多少多少元，只畀过，上海一直以唻是覅大欢喜去使用“元”迭个词眼个，而是欢喜去使用“块”迭个词眼，光光讲迭个词眼还覅唻三、覅算数个，还要勒“块”个后头去添加“洋钿”迭个词眼个，顾客覅管是去商店里向买卖各种物品或各种商品个辰光，还是去小菜场里向去买卖各种小菜个辰光，每趟勒向摊主询问商品价钿个辰光，眼扳数就是要去讨价还价个，还会用沪语方言去问摊主，曰：“迭样么事（商品）到底要几块洋钿啊？！”或曰：“迭条鲈鱼到底要支付几块洋钿就好卖畀吾啊？！”……迭两句话个意思是讲，吾需要支付多少铜钿，侪可以畀商品买勒跑。
还比方讲：“一块洋钿”“五块洋钿”……就算上海人讲讲辅币“角”搭“分”个辰光，覅管是纸币辅币，还是硬币辅币，眼扳数就是要去添加“洋钿”迭个词眼个，五分洋钿一把葱，一角洋钿三块老姜……要是讲有人勒讲讲几元一件或几元一斤之类个闲话，上海个营业员眼扳数是要勒背后头去讲迭能个一句沪语方言闲话，讲道：“刚刚唻买么事个人，真个就是属于一个标标准准个洋盘，有一眼阿乡兮兮（滴答）个，大概伊今早仔是刚刚从十六铺码头上唻！”……
吾勒上段文字当中，最后所撰写个迭段沪语方言俚语闲话，伊个含义搭意思就是勒讲：某个人，样样么事侪覅懂个，尤其是覅懂上海人勒方方面面个人情世故，以及上海人个习惯用语搭生活方式。
勒老底子个辰光、勒第四套人民币还呒没发明个前头，铜钿顶大个面额为“十元”，从大到小，上海人勒讲铜钿金额个辰光，最后眼扳数要去添加“洋钿”迭个词眼个，只畀过，也是有例外个辰光，自从国家开始发行第四套人民币，票面面值有50元搭100元面额个人民币以后，上海人每次勒讲到迭个两种人民币面额个辰光，就再也覅会去添加“洋钿”迭个词眼，为啥呢？！有交关多个上海人侪一致认为，要是添加以后，读起唻就会显得覅大流利，总觉着有眼拗口个。
勒老底子个辰光，辅币个面额分别就是“角”搭“分”，也就是今早仔讲个“零钱”。还因为勒老底子个辰光，上海人所使用个零钱，使用硬币唻得邪气多，纸币个零钱是覅大去使用个，因此讲，上海人对于辅币（零钱）是有两种讲法，第一种叫作“铅道罗”；第尼种叫作“铅角子”，“铅角子”个上海注音就是为：【Khae Kok Tsy】。第一种讲法是因为：外币零钱（辅币）侪是硬币材质个，而覅是纸币，“元”个英文单词叫作“dollar”，所以上海人就采用直接音译法，畀“dollar”翻译成为“道罗”，久而久之辰光一长，就中西合璧起唻，就畀辅币“零钱”叫作“铅道罗”。第尼种讲法是因为：“角”说个是铜钿个面值，“子”只畀过是名字后头个一个后缀罢了，“角子”原唻个意思是指以“角”为面值个硬币，到后末唻畀泛指为硬币搭零钱。
凡是交关细心个朋友，就会去发觉迭能一桩邪气有趣、有意思个事体，覅管是啥个面值个铜钿，尤其是辅币铜钿，小到一分洋钿，大到一块洋钿，覅是采用“铅”元素去制作而成个。嘎么，为啥事体上海人欢喜勒顶前头去添加迭个“铅”字呢？！就是因为，既覅管是土生土长个上海人，也覅管是土生土长个吴越体系人，是有迭能一种习惯个，欢喜畀各式各样个金属去统称为“铅”。就列举两个例子唻加以说明情况。还比方讲：“铅桶”，实际浪伊是由“铁”制作而成个“桶”，“铅丝”实际浪向侪是由“铁”制作而成个“铁丝”。
勒老底子个辰光，那些老一辈个上海人，每趟只要是讲到“铜钿”或者钞票个辰光，眼扳数是要去添加两个副词词眼个，迭两个副词词眼就是“麦克麦克”。比方讲：“侬看呀，李家爷叔经过自家个努力，开勒一爿烟纸店以后，呒没过忒多少辰光，伊赚勒交关多个铜钿，手里向个钞票也变得麦克麦克起唻勒！”……迭句闲话意思就是讲：李家爷叔经过自家个努力以后，经商获得交关多个铜钿。实际浪唻讲伐，像“麦克”迭个词眼就是英文单词“much”个上海音译方式，伊就是根据英语发音直接音译过唻个，“muchu”中文含义搭意思就是勒讲：交关多个意思。“麦克麦克”，今早仔个上海人就讲得邪气少勒，恐怕对于年轻一代个上海人唻讲伐，还覅一定会晓得迭个词眼个。
伴随着辰光个流逝，像“麦克麦克”使用个频率就变得邪气少，自从“麦克麦克”迭个词眼，再也覅去使用以后，上海人对于某户人家或者某个人，拥有交关多个铜钿以后，就喜欢用“分挺”“挺分”搭“立升”迭三个词眼予以替代之。比方讲：“小张今早仔分还是蛮挺个，袋袋里向侪是人民币，今早仔中浪向喫中饭个铜钿么，想办法就叫伊唻买一个单覅就好勒嘛！”还比方讲：自从拥有电冰箱以后，大家侪会去使用“立升”迭个词眼，为个就是表示电冰箱个尺寸到底是有多少个大小，久而久之辰光一长，聪明个上海人，就畀“立升”采用拟人化个手段去比喻人，但凡是那些拥有交关多个铜钿人家或个人，或者讲某些职权位高个个人，侪是会采用“立升”唻替代，一般是讲某人有经济实力、有能力、有实权，是属于一个中性词眼。
除忒上头所讲个，各式各样有关于“钱”个词眼以外，实际讲伐，勒上海个方言俚语闲话当中，还有得交关多个词眼当中，同样也是指“钱”迭个词眼个，吾就继续唻列举十个例子，继续讲下去吧！
第一就是：个人能够支配个私房小铜钿畀叫作“小户铜钿”搭“私房（铜）钿”。比方讲：私房铜钿么要囥囥好，要是畀老婆发觉并晓得以后，眼扳数要畀伊没收忒个，到辰光活络铜钿就呒没！
第尼就是：上海人欢喜畀小面额纸币叫“单票”，凡是票面金额低于“十块洋钿”侪叫作单票。比方讲：一块洋钿、五块洋钿。
第三就是：勒老底子个辰光，要是有人去商店或者“烟纸店”买卖各种物品个辰光，【备注：“烟纸店”是沪语方言，意思就是指上海滩浪专门经营日常用品为主个小杂货铺子。】但凡是找回唻个零钱，上海人侪是叫做“找头”个。比方讲：有人买好各种商品，拿好商品算好价钿以后，就会对营业员唻讲迭能一句沪语方言俚语闲话个，会讲道：“喂，营业员侬找头找得覅大对头个，侬顶起码还要少找吾三角洋钿铅道罗唻！”迭句闲话意思就是勒讲，营业员找顾客零钱个辰光，覅是呒没算准确，就是由于自家个粗心大意，少畀勒三角洋钿。
第四就是：老底子个辰光，尤其是国家勒发行第尼套搭第三套人民币个辰光，伊个钞票票面金额顶顶高也只有“十元”，所以讲那些老一辈个上海人，除忒交关欢喜去讲讲“十块洋钿”以外，还欢喜去讲讲“一张分”，所谓个“一张分”，伊就是指“十块洋钿”。
第五就是：对于那些老一辈个上海人唻讲伐，长期以唻一直侪是拥有迭能个一种习惯哦，上海人还欢喜畀一些“零钱”，既覅管自家个身边拥有多少个零钱，也覅管是纸币一类个零钱，还是硬币一类个零钱，还只要是零钱个票面金额侪是覅满一块洋钿人民币，侪是畀叫作“赖头分”个，比方讲：有上海人会讲讲迭能一句上海方言俚语闲话个，讲道：“还只要是让吾挨过三五天工夫以后，就要到10号勒，等到勒10号侪是吾发工钿个辰光，可惜勒迭个几天，吾袋袋里向基本哴向已经是空忒勒，也只畀过是省挺下唻一眼眼赖头分而已！”……迭句闲话意思是讲，吾个口袋里也只是剩下一眼眼零碎个铜钿！
第六就是：勒交关长个一段辰光，老一辈个上海人还是交关欢喜去讲讲“一粒米”迭个词眼，迭个词眼顶早又是从啥个辰光，侪开始讲起唻个呢？！就是从20世纪70年代末期到20世纪80年代初期个辰光，逐渐个开始流行起唻个，因为勒掰搿辰光，勒中国个大地上，陆陆续续个出现有“万元户”个人家，而像迭能个人家如雨后春笋一样变得越唻越多，伊个意思就是指人民币一万块。比方讲：时唻运唻推覅开，今早仔吾运道哪能嘎么嘎好啦，吾畀股票抛忒，去忒车马钿以后，正好赚到一粒米。迭句话意思讲吾勒股票浪赚到1万元。
第七就是：对于那些老一辈个上海人唻讲伐，勒老底子个辰光，那些“（过）路费”“路桥费”或“手续费”叫作“车马钿”。
第八就是：对老一辈个上海人唻讲，每个号头个“工资”，上海人侪欢喜叫作“工钿”迭个词眼。比方讲：老张搭老李两个人是交关要好个朋友，某一天两个人勒一道“嘎讪胡”“谈山海经”个辰光，【备注：“嘎讪胡”搭“谈山海经”是沪语方言，意思就是指聊天。】老张就询问道：“侬伲子每个号头工钿好拿几钿，有多少工钿啊？！”老李讲道：“每个号头税后好拿到工钿八千洋钿。”老李也同样向老张去问迭句闲话，老张就接下去讲道：“侬千万覅要去动气哦，侬个伲子忒吾个囡鱼是覅好比个唻，伊税后正好拿到一粒米！”……
第九就是：上海人欢喜畀“赚铜钿”叫“扒分”。比方讲：有两个好友小王搭小孙勒一道嘎讪胡谈山海经，小王讲道：“侬近抢把勒拉啥个地方高就扒分啦？！”小孙就唻讲道：“吾还是勒拉原唻个单位做生活，做一休一，休息个辰光，通过炒股票唻扒分。”……
第十就是：上海人畀“资金周转”迭个词眼叫作“调头寸”。比方讲：小孙业余辰光就是欢喜炒炒股票，近抢把看中某只股票，手头浪还缺少一眼眼资金，就问老朋友小王唻调一个头寸，勒电话里就对小王唻讲道：“侬是晓得吾欢喜炒股票个，吾伲是要好老朋友，覅好意思啊，今早仔吾要向侬唻调一个头寸，还缺三五万铜钿，只要侬肯借三五万铜钿，等赚到铜钿以后，吾伲两个人五五分账！”……
当文章写到此地个辰光，也已经是接近末尾，快要结束个辰光，吾本人还想去讲讲迭能个一句闲话哩，实际浪向，就勒上海迭座城市个历史浪向，还勒上海方言闲话个发展搭演变个全过程中，还会拥有交关多个上海方言闲话词眼唻，就是从英文单词直接音译过唻个，覅是去采用上海闲话当中个读音方式，就是去采用其他地方方言个读音方式，譬如说“水门汀”“司的克”搭“斯达特”……“水门汀”就是指“水泥地”；“司的克”就是指“拐杖”；“斯达特”就是指日光灯启动器；凡事种种举不胜举，吾还是能寻到交关多个！……
【备注：①：文章为作者原创；②：各种搭文章有关系个图片、各种老上海风情图片、人民币图片侪是唻源于网络上头；③：万分感谢原创图片。】
杜老倌侠客居（陆伟）写于2021年03月04日礼拜四夜里向
