<ཁག་དང་པོ།>
དྲན་པ་ཕྱི་རོལ་གྱི་ཆུ་བོ་དྭངས་མོ་དེ་རེད།།
ཤག་ཤག་བཞུར་སྒྲ་དང་བཅས་ཏེ་བཞུར་མཚམས་མི་ཆད།།
གལ་ཏེ་ལས་དབང་འདི་གནམ་སའི་བར་ཐག་མིན་ན།།
ཡངས་པའི་ས་གཞི་ནས་གོམ་པ་མཉམ་དུ་སྤོ་ཆོག།
འཇིག་རྟེན་ཁྲ་ཁྲ་ཡི་གསེང་ནས་འཁོར་བ་བརྒྱ་སྟོང་།།
འུར་གཏམ་ཅག་ཅག་གི་ནང་ནས་དགོད་པ་བརྒྱ་སྟོང་།།
ཀུ་རེའི་ཨ་མཚར་གྱི་གླིང་ནས་ཐིམ་པ་མང་སོང་།།
ཁྱེད་ཉིད་མཇལ་བ་དེ་ལས་སྐལ་ཡིན་པ་མ་ཤེས།།
སྐྱེས་གཟུགས་འདབ་མ་ཡི་ལང་ཚོ་དར་བའི་ལྷ་མོ།།
ང་ཡིས་མིག་ལམ་ན་ཐོགས་པའི་མེ་ཏོག་རྐང་གཅིག།
མཛེས་པ་དབྱར་གཞུང་གི་སྤང་ཐང་སྔོན་པོ་དེ་རེད།།
སྣང་བ་དྭངས་གསལ་གྱི་གཡུ་ཡི་མཚོ་མོ་དེ་རེད།།
ཞིང་ཁམས་འདི་ནས་ཡང་ཁྱེད་ཉིད་མཐོང་བ་ཉུང་ཉུང་།།
ཨེ་མ་ཁྱེད་ཉིད་ནི་མཇའ་ལྟར་ཡལ་བ་མིན་ན།།
འཕྲད་པའི་སྟབས་ཁ་ཤིག་ང་ལ་སྟེར་རོགས་བྱོས་དང་།།
དགའ་དུང་འདྲིས་མ་ཡི་གླུ་ཞིག་ཁྱོད་ལ་ཕུལ་འདོད།།
ཕྱི་ཡི་ལུས་པོ་ནི་དུང་མདོག་ཟླ་བའི་མཛུམ་ཞལ།།
ནང་གི་སེམས་པ་ནི་འོ་མའི་རྒྱ་མཚོ་འཁྱིལ་འཁྱིལ།།
དམ་ཚིག་དངོས་མ་ཞིག་ཁྱོད་ལ་ཡོད་པ་ཡིན་ན།།
འཕགས་མ་ཁྱོད་ཉིད་ལས་གཞན་ཞིག་དགོས་པ་མི་འདུག།
<ཁག་གཉིས་པ།>
ཉི་འོད་སེར་པོ་ཁྱེད་ཀྱི་འདུག་རོགས་ཡིན།།
སྤང་ལྗོངས་སྔོན་མོ་ཁྱེད་ཀྱི་མཛེས་གཞི་ཡིན།།
སྦྲ་ནག་གྲུ་བཞི་ཁྱེད་ཀྱི་དྲོད་ཁོལ་ཡིན།།
ཁྱེད་ནི་སྤྲོ་ཞིང་ཁྱེད་ནི་སྐྱིད་པ་ལ།།
ནམ་མཁའ་སྔོན་མོ་ཁྱེད་ཀྱི་འོད་སྣང་ཡིན།།
སྤྲིན་པ་དཀར་པོ་ཁྱེད་ཀྱི་སེམས་པ་ཡིན།།
མེ་ཏོག་སེར་ཆེན་ཁྱེད་ཀྱི་སྐྲ་རྒྱན་ཡིན།།
ཁྱེད་ནི་མཛེས་ཤིང་ཡིད་དུ་འོང་བ་ལ།།
ཕ་སྐད་དྭངས་མ་ཁྱེད་ཀྱི་བླ་སྲོག་ཡིན།།
བོད་ལྭ་དག་མ་ཁྱེད་ཀྱི་རྒྱན་ཆ་ཡིན།།
མི་གཤིས་བཟང་པོ་ཁྱེད་ཀྱི་གོམས་སྲོལ་ཡིན།།
ཁྱེད་ནི་དྭངས་ཤིང་ཁྱེད་ནི་གཙང་བ་ལ།།
ཅ་ལེ་ཅོ་ལེའི་སྐད་ཆ་ཁྱེད་ལ་མེད།།
ཕྲག་དོགས་གཡོ་རྒྱུའི་ཧམ་སེམས་ཁྱེད་ལ་མེད།།
ཆང་ཁང་འུར་ཁང་ནང་ལ་འཁོར་མ་མྱོང་།།
ཁྱེད་ནི་བག་ཡོད་ཁྱེད་ནི་ཚུལ་ལྡན་ཡིན།།
རྫ་ཆབ་སྔོན་མོ་ཁྱེད་ཀྱི་འཐུངས་ཆུ་ཡིན།།
འབྲི་དམར་སེར་བོ་ཁྱེད་ཀྱི་ཁ་ཟས་ཡིན།།
གཡང་དཀར་ལུག་ཁྱུ་ཁྱེད་ཀྱི་འཚོ་བརྟེན་ཡིན།།
ཁྱེད་ནི་ཐང་གི་དབྱངས་ཅན་ལྷ་མོ་ཡིན།།
<ཁག་གསུམ་པ།>
མཐོང་བ་བརྒྱ་ཚོགས་སྟོང་ནས་ཁྱེད་ཉིད་མིག་ལ་ཐོགས་པ།།
ཚེ་འདིའི་ལས་དབང་ཡིན་ནམ་ཡང་ན་ལན་ཆགས་ཤིག་རེད།།
གམ་དུ་བསུ་བའི་ཐབས་ཤིག་ཁོ་བོར་དངོས་ནས་དབེན་འདུག།
རེ་ཕྱག་འཚལ་དོན་མི་འདུག་ཁྱེད་ཉིད་གླེང་དོན་མེད་དོ།།
སྲིད་པའི་འཇིག་རྟེན་གྲོང་ནས་ཁྱེད་ཉིད་མཇལ་བ་དཀའ་འདུག།
ཁྱེད་ནི་མཇའ་མཚོན་ལགས་པས་ཟིན་པའི་རེ་བ་མི་འདུག།
མཛེས་སྡུག་རྣམ་པར་བཀྲ་བའི་ཞིང་ཁམས་གཞན་ཞིག་ཡལ་ཐཱ།།
སེམས་དང་སེམས་པའི་བར་ནས་སྐྱོ་བའི་དངན་པ་འཐེན་ནོ།།
ཁྱེད་ནི་གཡུ་ཡི་མཚོ་མོ་སེམས་ལ་ནག་ཐིག་མི་འདུག།།
ཁྱེད་ནི་གུར་ཀུམ་མེ་ཏོག་ས་གཞིའི་མཛེས་རྒྱན་ཡིན་ནོ།།
ཁྱེད་ནི་དབྱངས་ཀྱི་སྐུད་པ་འཐེན་ན་སྐྱིད་ཅིག་ཡོད་རེད།།
ཁྱེད་ནི་འབྲི་མོའི་འོ་མ་ཁོ་བོའི་དགོང་ཇ་ནང་ཇ།།
མ་འདྲིས་སེམས་ཀྱི་མདུད་པ་རླུང་དང་ཆུ་ལ་མ་སྐུར།།
མི་ཁའི་རླུང་བུ་རྫིག་པོ་གཡུག་ན་གཡུག་གི་ཞོག་ཡ།།
གནམ་སའི་བར་ཐང་ཞིག་ནས་སྙིང་གཏམ་གླེང་སྟབས་ལོས་ཡོད།།
སེམས་དང་བསམ་པ་མཐུན་ན་དེ་ལས་ལྷག་ཅིག་མི་དགོས།།
ཁྱེད་ཀྱིས་ང་ལ་གནང་བ་ཚོར་བའི་ཡིག་ཉོག་འགའ་རེད།།
བཀླག་ན་བཀླག་རིན་མེད་པའི་ཐལ་དྲིའི་ཚིག་འགའ་ཡིན་ནོ།།
བསམ་ཚུལ་རབ་རིབ་ཞིག་གིས་ཁྱེད་ཀྱི་རྨི་ལམ་དཀྲོགས་ཐཱ།།
སྙན་ངག་ཟེར་ཡ་མི་འདུག་དོན་གྱི་ཟིན་བྲིས་ཡིན་ནོ།།
<ཁག་བཞི་བ།>
ད་ནི་ཁ་བ་བབས་སོང་།།
སེམས་པ་ཁ་བས་གཡོགས་སོང་།།
སྙིང་སྡུག་གཡུ་ཆུང་སྒྲོལ་དཀར།།
ཙག་རླུང་ཁྱོད་ནས་དྲན་འོང་།།
ཉིན་དེར་ཁྱེད་རང་དྲན་ཚུལ།།
ནམ་མཁའི་ཉི་མ་གསལ་ལོ།།
མཚན་དེར་ཁྱེད་རང་རྨིས་ཚུལ།།
ཡིད་འཕྲོག་ཟླ་བས་ཤེས་སོ།།
དུས་དེར་མི་མཐོང་དགུ་མཐོང་།།
ཁྱེད་ཀྱི་ཞལ་རས་མཐོང་ངོ་།།
དུས་འདིར་མི་དྲན་དགུ་དྲན།།
ཁྱེད་ཀྱི་སྒེག་ཉམས་དྲན་ནོ།།
ཟླ་འདིའི་ཉིན་ཞག་དེ་ཚོ།།
མིའི་སེམས་ངོ་མ་འགྱུར་མེད།།
ཁ་མཚར་གློད་པར་དགའ་བའི།།
སྨད་ཀྱི་སྲས་མོ་ལགས་ཨེ།།
ཡུལ་དེའི་ལུང་པའི་ཕུབ་ན།།
བྱ་ལས་ཅ་ཅོག་མང་ངམ།།
ཇག་པའི་ཐལ་ཅག་ཡོད་དམ།།
ཁྱེད་ཀྱིས་དཀའ་ཚེགས་རེག་གམ།།
ཁ་པར་ལག་ཏུ་བཟུང་ནས།།
སྐུ་ལུས་འཚམས་འདྲིའི་ཚིག་འགའ།།
མྱུར་དུ་སྐུར་བར་བྲེལ་དུས།།
ཐག་རིང་གྲོགས་པ་ཞིག་གིས།།
ཁ་པར་སིལ་སིལ་ཡོང་ནས།།
སྐད་ཆ་མང་ཙམ་མོལ་སོང་།།
ཆ་འཕྲིན་སྐུར་བའི་མདུན་པ།།
སྐད་ཅིག་ཙམ་གྱིས་འདས་སོང་།།
<ཁག་ལྔ་བ།>
མགོ་ཡི་སྐྲ་ལོ་མེ་ཏོག་ཕྲེང་བ་ཅན།།
སོ་ཡི་རང་མདངས་དུང་དཀར་གཡས་འཁྱིལ་ཅན།།
ཞལ་གྱི་ཟླ་བ་མཛེས་པར་མི་ངལ་བའི།།
དོན་གྱི་འཕགས་མ་ལྷ་མོ་དེ་རང་དྲན།།
གོས་ཀྱི་རང་མདོག་ནག་པོ་ནག་རྐྱང་ཅན།།
ཁ་ཚིག་ངག་དང་བསྙམས་པའི་ཁུ་བྱུག་ཅིག།
གློག་འོད་དཀར་ལམ་འཁྱུགས་པའི་གྲོང་དཀྱིལ་ནས།།
གཞས་དང་རྩེད་འཇོའི་སྟངས་སྟབས་ཨེ་མ་རྨད།།
དེ་དུས་ཁྱེད་ཀྱི་གར་ལ་སྤྲོ་མཁན་མང་།།
ཁོ་བོ་རྒྱུན་པར་དེ་རུ་ཕྱིན་པ་མང་།།
ཉིན་མ་འཁའ་ནས་འཕྲོས་དང་ནུབ་པ་སོགས།།
ཐ་ན་བྱ་ཕོ་གྲགས་པར་ཐོས་པ་ཉུང་།།
ཨེ་མ་གསོན་དང་སྙིང་གི་ཟླ་ཤེལ་མ།།
སྙེ་མ་ཕོན་གཅིག་གཤོག་མྱུར་སྒེག་ལྡན་མ།།
གཡུ་སྦྲང་འཁོར་བའི་མེ་ཏོག་རྐང་གཅིག་མ།།
ཚེས་བཟང་གནམ་གྱི་སྐར་མ་འོད་པོ་ཆེ།།
ནགས་ཀླུང་ཚང་ཚིང་འོག་གི་སྐད་སྙན་མ།།
དུས་ཀྱི་འཕོ་འགྱུར་འོག་ནས་སྤྲོ་འཛུམ་རྒྱས།།
ཚོང་ཁྲོམ་རྩེ་ཁྲོམ་འཁོར་བའི་བར་གསེང་ནས།།
དྭངས་པའི་སྐྱེས་གཟུགས་མཐོང་སྐར་མ་འགའ།།
<ཁག་དྲུག་པ།>
ས་འཛིན་དཀར་པོའི་འདབས་ནས་རྒྱས་གྱུར་པའི།།
ཟག་པ་མེད་པའི་གཞོན་ནུའི་མ་ལ་ཏི།།
དབྱར་གྱི་སྤང་མའི་རྒྱན་དུ་མཛེས་གྱུར་པའི།།
སྐྱེས་མའི་ནང་གི་སྐྱེས་མཆོག་ཁྱོད་ལ་འདུད།།
ཟླ་འོད་གསལ་ལ་གཙང་བོ་དལ་གྱིས་བཞུར།།
མེ་ཏོག་སད་ལ་མགོ་ལྕོག་ལྡེམ་ལྡེམ་ལྡེམ།།
ང་ནི་དགའ་སའི་གཡུ་སྒང་མེ་ཏོག་ནི།།
རི་ཆུ་སྟོང་གི་ཕར་ལ་བཞད་པ་སྐྱོ།།
ཤ་དང་རུས་ནས་དྲན་པའི་རྔུལ་ཆུ་བཞུར།།
དུང་བའི་ཚིག་དག་ཡ་ཆུང་སེམས་ནས་བཀྲམ།།
ད་ནི་ཁྱེད་ཀྱི་རྒྱབ་གཟུགས་ནག་པོ་སྟེ།།
དེ་དགོང་ང་ཡི་རྨི་ལམ་ནང་དུ་ཤོག།
ང་ཡི་གཟུགས་པོའི་གྲུབ་ཆ་གཙོ་བོ་ནི།།
ཁྱེད་ཀྱི་སྐུ་དང་ཐུགས་ཀྱི་བྱིན་རླབས་སོ།།
མེད་ན་མི་འགྲིག་གཤོག་ཡ་འཕུར་རོགས་ཡིན།།
མདུད་པ་ཆ་འདི་འཇུག་སྒྲིལ་མེད་པར་སྨོན།།
འདི་ནས་འཕུར་འདི་ཁྱེད་ཀྱི་སྐྲ་ལོ་རེད།།
འདི་ནས་བཞད་འདི་ཁྱེད་ཀྱི་ལང་འཚོ་རེད།།
འདི་ནས་འཛུམ་འདི་ཁྱེད་ཀྱི་སྒེག་ཉམས་རེད།།
རྒྱུན་པར་གླེང་བྱ་ཁྱེད་ཉིད་གཅིག་པུ་ཡིན།།
<ཁག་བདུན་པ།>
ལྷད་མེད་ཀྱི་བརྩེ་བ་ལྡན་པའི།།
དུང་སེམས་ཀྱི་རླབས་ཕྲེང་འཕྱུར་བའི།།
སོ་དཀར་གྱིས་གམ་ལ་བསུ་བའི།།
སེམས་དམར་པོའི་ཕྱེད་ཀ་དྲན་ཀི།།
འཛུམ་དམུལ་གྱི་མེ་ཏོག་འཐོར་བའི།།
འགྲོ་རྗེས་ལ་སྙན་ངག་གྲུབ་པའི།།
ནང་སེམས་ལ་དྲོད་ཁོལ་སྟེར་བའི།།
ཡུལ་གཞན་གྱི་ཁུ་བྱུག་དྲན་ཀི།།
ཚིག་སྙན་མོའི་བརྗོད་བྱ་སྤེལ་ས།།
གྱེས་བྲལ་གྱི་ན་ཟུག་འཇོག་མཁན།།
ཁ་ཐུམ་གྱི་གསེང་ནས་དགོད་པའི།།
མཁུར་འཛུམ་གྱི་ན་ཆུང་དྲན་ཀི།།
དཀར་གསལ་གྱི་ཟླ་བའི་འོག་ཏུ།།
སྐྱེད་ཚལ་ནི་འཇམ་ངེར་བཞད་སྐབས།།
འཆམས་འཆམས་སུ་ཕེབས་པར་བྱོས་དང་།།
ངས་འཇོག་པའི་སྙན་ངག་བཀླག་ཆོག།
ཕྱི་རོལ་ནས་ཁ་དོག་འཚོལ་མཁན།།
ནང་རོལ་ནས་སྐྱོ་གར་འཁྲབ་ས།།
དགའ་ཕྱོགས་ལ་གཅེས་སྤྲས་བྱེད་པོ།།
ཡོད་ཚད་ཀྱི་རྒྱབ་ལྗོངས་ངས་བྱེད།།
ཁྱོད་དགའ་ན་ང་ཡང་དགའ་ཆོག།
ཁྱོད་སྐྱོ་ན་ང་ཡང་སྐྱོ་ཆོག།
མི་ཚེ་ཡི་འོད་ལམ་ཅིག་པུ།།
ཁྱོད་ཉིད་ལས་སུ་ཞིག་མ་མཐོང་།།
<ཁག་བརྒྱད་པ།>
ཁུ་བྱུག་རྒྱུ་བའི་རི་བོ་ཀན་ས་ནས།།
རི་གླུའི་སྒྲ་དབྱངས་འཐོར་བའི་ལོ་རྒྱུས་ཡོད།།
སྨད་ཀྱི་ལུང་པའི་མི་ཚོགས་ཁྲོམ་དཀྱིལ་ནས།།
སྙན་ཞིང་འཇེབས་པའི་རྩོམ་འཐོར་བྲིས་སྲོལ་ཡོད།།
ལྭ་ནག་རྗེན་པར་གྱོན་པའི་ན་ཆུང་མ།།
དུས་ཚོད་ཉེར་བཞིའི་བར་གྱི་ཟིན་བྲིས་ཡིན།།
རྟག་ཏུ་འཁོར་བའི་ཉི་མའི་འོད་ཐིག་ཡིན།།
སྙན་ངག་གྱེར་སའི་གྲུབ་ཆ་གཙོ་བོ་ཡིན།།
བརྩེ་དུང་ལོ་འདབ་རྒྱས་པའི་སྐྲ་རིང་མ།།
ཙག་རླུང་འུར་འུར་ཁྲོད་ནས་གླེང་གི་ཡོད།།
ཇ་ལོ་དམར་པོའི་མངར་སྐྱུར་འཚོལ་རོགས་རེད།།
འདྲིས་ན་འདྲིས་ཡིན་ཡོད་པའི་ཚེ་གྲོགས་ཡིན།།
བཤད་པ་བརྒྱ་སྟོང་འདི་དག་འུར་གཏམ་མིན།།
དོན་དངོས་དགའ་བའི་སེམས་ནས་བྱུང་བ་ཡིན།།
ཁ་ཡག་ངོ་དགའ་ཡིན་ན་བསད་ནི་ཡིན།།
བདེན་པར་གྲུབ་པའི་སྐད་འདི་དོ་སྣང་གལ།།
ཨ་རོག་མཛེས་མའི་ཡངས་རྩེའི་བློ་དཀར་མ།།
ཆར་གྱི་དངོས་གྲུབ་ང་ལ་གནོངས་བར་བྱོས།།
ཕྱི་དཀར་ནང་དཀར་ཅན་གྱི་འཕགས་མ་ཁྱེད།།
སྨག་རུམ་དཀྲོགས་པའི་སྒྲོན་མེ་འོད་པོ་ཆེ།།
<ཁག་དགུ་བ།>
ཐོག་མའི་མིག་ལམ་ན་འཕྲོད་པའི།།
སེམས་ཀྱི་སྨན་རྩ་དེ་ཁྱེར་མཁན།།
སུ་ཞིག་ཡིན་ནའང་དེ་ཡིན།།
རྙེད་པའི་གོ་སྐབས་ཤིག་མ་རག།
བར་དུ་འཕྲད་པ་ནི་ཉུང་ཉུང་།།
ལས་ཞིག་མེད་པ་འདྲ་ཡིན་འདུག།
གྱེས་པའི་ལམ་ཁར་ལ་བུད་སོང་།།
ཕྱིར་མིག་བརྒྱ་སྟོང་གི་ཁྲོད་ན།།
གྲིབ་གཟུགས་སྐྱ་བོ་ཅིག་ལུས་ཡོད།།
བརྩེ་འདང་འོ་མ་ཡི་འཚོ་བཅུད།།
རོལ་བའི་སྟབས་ཁ་ཅིག་མི་འདུག།
ཁ་ཁར་འགྲོ་དགོས་འདི་མཚར་རོ།།
སེམས་གཏིང་ཐིག་ལེ་ཅིག་ཡོད་འདི།།
ཕལ་ཆེར་དྲན་གདུང་གི་རྨ་ཁ།།
བཟོད་ཐབས་མེད་པ་ཞིག་ཡིན་ན།།
ཁྱེད་རང་རྙེད་ཐབས་ཤིག་བྱེད་ངེས།།
རླུང་བུས་ཁ་ལྕེ་ཡང་སྐམ་སོང་།།
སྙན་ཚིག་འབྲི་རྒྱུར་ནི་དཀའ་མོད།།
དཀའ་རུང་ཁྱེད་ཉིད་ལ་ཅིག་བྲི།།
རྔུལ་ཆུའི་ཐིག་པ་འགའ་ལྷུང་ཆོག།
<ཁག་བཅུ་བ།>
དིང་གི་ཁྱོད་ནི་མཚོ་ཁའི་མེ་ཏོག་ཡིན།།
དབྱར་གྱི་སྤང་མའི་ཁ་དོག་འཚོལ་མཁན་ཡིན།།
སེམས་ཀྱི་རི་མོ་བཏབ་སའི་ཤོག་བུ་ཡིན།།
ཚོར་བའི་ཡིག་འབྲུའི་ཁ་བྱང་ངོ་མ་ཡིན།།
གཟུགས་པོ་དར་ལ་བབས་པའི་གསེར་མཚོ་མ།།
ཉ་གུང་ཟླ་བའི་འོད་ཐིག་ཁེར་གསལ་ཡིན།།
སྒེའུ་ཁུང་འགྲམ་གྱི་མེ་ཏོག་རྙིང་བ་དེའི།།
འཕུར་རོགས་ཡིད་ཀྱི་བྱེའུ་ཆུང་གཤོག་ནག་གོ།
ཆང་ཁང་གླུ་ཁང་གཞས་ཁྱིམ་བླ་གབ་ནང་།།
ཁྱེད་དང་འདྲ་བའི་ལྷ་མོ་དཀོན་དཀོན་ཡིན།།
གཞོན་ནུའི་ཕྲེང་ཅན་སེམས་ཀྱི་མགུལ་རྒྱན་ཨེ།།
ཞལ་གྱི་འཛུམ་རིས་ང་ཡིས་ཟིན་པར་སྨོན།།
རླུང་བུས་ཁུར་བའི་ལོ་མ་དམར་པོ་བཞིན།།
དྲན་གདུང་སྙིང་གི་འཕར་རྩ་ཁྱེར་མཁན་མ།།
མཚན་མོར་འོད་མདའ་འཕེན་པའི་བུ་མོ་འདི།།
དོ་ནུབ་རྨི་ལམ་དཀྲོག་པའི་དྲན་ཐོ་ཡིན།།
འཁོར་བའི་ཆོས་ལ་ཀ་བ་བཙུག་མཁན་ཏེ།།
ལས་ཀྱི་ཐག་པ་མདུད་པའི་དུང་དཀར་མ།།
མིག་ལ་འཇིག་རྟེན་སྐྲུན་པའི་བུ་མོ་འདི།།
སེམས་ཀྱི་བག་ཆགས་འཇོག་སའི་གཞི་མ་ཡིན།།
