སྐྱེ་འགྲོ་མིའི་བྱུང་ཚུལ།
རྩོམ་པ་པོ---ཉག་ན་བུན
སྤྱིར་ལོ་རྒྱུས་འདི་ང་ཚོ་བོད་རང་ལ་མཚོན་ན་འོ་སྐོལ་ཁ་བ་ཅན་གྱི་ཡུལ་གྲུ་ན་ཆེས་ལེགས་པར་བཤད་པའི་བན་བོན་གཉིས་ཀྱི་ལུགས་ལས་གྲུབ་པའི་བཀའ་བརྟེན་དང་ལུང་དག་ལ་དད་པ་དང་ཡིད་ཆེས་ཡོད་པས་དེར་གཞི་རྩ་འཛིན་དགོས་སྙམ་སྟེ། འགྲོ་བ་མི་འདི་བྱུང་ཚུལ་ལ་བཤད་སྟངས་འདྲ་མི་སྣ་ཁ་མང་ཡང་འདི་ནས་འདོད་སྟངས་གསུམ་གྱི་སྒོ་ནས་བཤད་བསམ་བྱུང། ༡ མུ་སྟེགས་ལྟ་ལོག་ལུགས་ཀྱི་ལ་ལས་འདོད་སྟངས་ནི་འཇིག་རྟེན་པའི་ལྷ་ཚངས་པས་དབང་བྱས་ནས་སྐྱེ་འགྲོའི་མི་བྱུང་བར་རིགས་པ་ནི་ནང་བའི་ལུགས་ལ་ཤིན་ཏུ་དགག་བྱ་ཡིན་ཏེ། ལས་འབྲས་དགོས་མེད་དུ་འགྱུར་ཏེ་འཇིག་རྟེན་བྱེད་པོས་དབང་བྱེད་པ་དང་དེའང་རྟག་པ་དང་ཆད་ལྟའི་ཁུངས་སུ་འདུ་བས་ལས་འབྲས་རྣམ་བཞག་གམ་བདག་མེད་པ་སོགས་དང་ཤིན་ཏུ་འགལ་བས་མི་འཐད་དོ།༢ བནྡེ་ལུགས་ནས་བྱས་ན་བཀའ་ཆེམས་ཀ་ཁོལ་མ་དང་ཆོས་འབྱུང་བློ་གསར་རམ་རྒྱ་བོད་ཡིག་ཚང་ཆེན་པོ་སོགས་ཀྱི་དགོངས་པ་ཕལ་ཆེར་གཅིག་མཐུན་འདྲར་སྙམ།
དང་པོའམ་གདོད་མ་ནས་འགྲོ་བ་མི་མེད་པ་སྲོག་ཆགས་གཞན་སྤྲེའུ་དྲེད་སོགས་མིའི་སྔོན་དུ་ཡོད་པ་ཡང་བཀའ་ཆེམས་ཀ་ཁོལ་མ་ནང་ན་གསལ་བོར་བཤད་འདུག ཇི་སྐད་དུ བོད་ཡུལ་སྟོད་སྨད་བར་གསུམ་གྱི་ཁམས་ན་ཆུ་ཀླུང་ལ་སོགས་པ་དུད་འགྲོའི་རིགས་སུ་གྱུར་པ་སྣ་ཚོགས་གནས་ཏེ། མིའི་འགྲོ་བ་གཅིག་ཀྱང་ཡེ་མེད་པས་འདུལ་བའི་སྐབས་མ་རྙེད་ཅེས་གསུངས་འདུག ད་དུང་སྲིན་ཡུལ་ལུང་ཀ་པུ་རིར་ལྷ་དང་ལྷ་མི་གཉིས་ལྷ་མོ་གཟི་ལྡན་མ་ལ་མ་འཆམས་ནས་འཐབ་པ་སྤྲེའུ་གྱད་ཧ་ནུ་མ་ད་བྱ་བ་སྤྱན་རས་གཟིགས་ཀྱི་སྤྲུལ་པའི་སློབ་མ་དེ་རི་པོ་ལར་སྤྱན་རས་གཟིགས་ཀྱི་དྲུང་དུ་ཕྱིན་པ།སྤྲེའུ་དེར་ཁྱེད་བྱང་ཕྱོགས་བོད་ཁ་བ་ཅན་གྱི་བྲག་རི་ན་སྒོམ་ནུས་སམ་དྲིས་པར་ལན་སྤྲེའུ་ན་རེ་ནུས་གསུངས་པ། དེ་ནས་སྤྱན་རས་གཟིགས་ཀྱིས་སྤྲེའུ་ལ་དགེ་བསྙེན་སྡོམ་པ་ཕོག་བ།ལེགས་བཤད་རྒྱ་ཆེར་གནང་བ། མཚན་ལ་སྤྲེའུ་བྱང་ཆུབ་སེམས་དཔའ་གསོལ།རྗེས་སུ་གོང་གི་ལུང་གནང་བ་བཞིན་དུ་བོད་དུ་ཕྱིན་ནས་བར་ཁམས་བྲག་ན་ཕེབས་ནས་མི་སྡུག་པ་སྒོམ་པར་གནས། དེ་ལ་གནས་པའི་བྲག་སྲིན་མོའི་འདོད་པས་སྤྲེའུ་སྒོམ་ལ་འདོད་ཆགས་ཚུལ་སྟངས་སྟབས་གང་མང་བསྟན་ནས་ཁྱེད་ང་གཉིས་ཁྱིམ་ཐབ་བཟའ་ཚོ་བྱའོ་ཟེར་བ་ལ། སྤྲེའམ་སྤྲེའུ་སྒོམ་ན་རེ། ངས་དེ་ལྟར་བྱ་མི་རུང་སྤྱན་རས་གཟིགས་ཞབས་ནས་སྡོམ་པ་ལེན་རྒྱུ་རྣམས་སྲིན་མོར་གདམས་ཀྱང་སྲིན་མོས་དང་ལེན་མ་བྱེད་པའི་སྒོ་ནས་སྤྲེའུ་སྒོམ་ལ་ཞེ་སྡང་གི་སྐད་ཆ་སྨྲས་ནས་སྤྲེའུ་སྒོམ་བསམ་པ་ལ་དེ་དང་ཁྱིམ་ཐབ་མ་བྱེད་ན་ཞེ་སྡང་དབང་གིས་ཁོང་དམྱལ་བར་ལྟུང་། བྱས་ན་སྡོམ་པ་འཆོར།མ་བྱས་ན་བྱང་སྡོམ་ཉམས་པར་དོགས་ནས་ཕྱིས་སུ་སྤྱན་རས་གཟིགས་ལ་འདྲི་སོང་བར་འཕགས་པ་ན་རེ་ཆོག་གོ་ལུང་མཛད་པས་སྤྲེའུ་སྒོམ་ཡང་ཕྱིར་ཕྱིན་པ་ཁོང་གཉིས་བཟའ་ཟླ་བྱས་ནས་བུ་ཡབ་ཡུམ་གཉིས་དང་མ་འདྲ་བ་ཞིག་སྐྱེས།དེའི་ཚེ་མའི་ལྟོ་བ་ལྟོགས་པས་བུའི་ཟས་བྱས་སྙམ་ནས། དེ་ཕྱིར་ཕས་བུ་ནགས་ཚལ་དུ་སྐྱལ་སྤྲེའུ་དང་མཉམ་དུ་བཞག དུས་ལོ་ཟླ་འགའ་རེ་ཤུལ་དུ་ཕས་བུར་ལྟ་སྐོར་སོང་ཚེ་བུས་སྤྲེའུ་དང་བཤོས་ནས་བུ་ལྔ་བརྒྱར་གྱུར་པ་དང་བུ་རྣམས་ལ་རྔ་མ་མེད་པ་གདོང་དམར་བ་ཤིང་རྩེད་མི་ཤེས་པ་ཡབ་ཡུམ་ཟུང་དང་མི་འདྲ་བ་ཞིག་སྐྱེས། སྤྲེའུ་སྒོམ་ལ་བུ་ཚ་མང་བས་ཟས་ཀྱིས་གདུང་བ། སྤྲེའུ་སྒོམ་གྱིས་ཐབས་ཤེས་བཀོལ་ནས་ཤིང་ཏོག་ཟ་རྒྱུ་བྱས།འཕགས་པ་སྤྱན་རས་གཟིགས་ཀྱིས་འབྲུ་ལྔ་སྤྲེའུ་སྒོམ་ལ་བྱིན་པར་ས་བོན་བཏབ་ནས་ཁ་ཟས་མི་སྡུག་པའི་ཐབས་དེ་ནས་བྱུང་། དེ་ནས་རིམ་པ་ལྟར་ཉོ་ཚོང་སོགས་གོང་ནས་གོང་དུ་འཕེལ་བར་གྱུར་པ་དེ་གོང་གི་བན་དེའི་ཡིག་ཆར་གཟིགས་ན་རིམ་པ་ལྟར་ཡག་པོ་འདུག འདིར་རྒྱས་པ་མ་སྤྲོས་སོ།།འཇིག་རྟེན་ཁ་སྐད་ལ་ལར་སྤྲེའུ་སྒོམ་གྱི་རྔ་མ་གེ་སར་གྱིས་བཅད་ནས་ཤུལ་དུ་བུར་རྔ་མ་མེད་པ་དེ་ནས་མི་རུ་འཕོ་འགྱུར་བྱུང་བ་བཤད་སྲོལ་ཀྱང་གྲགས།
དེ་ནི་བདག་གི་ཡིད་དུ་དགོད་བྲོའི་རྣམ་པ་ཞིག་ཤར།
རྒྱུ་མཚན་དེ་ནི་རྟ་ཡི་རྔ་མ་བཅད་རྗེས་རྒོད་མའི་རྟེའུ་ལ་རྔ་མ་མི་སྐྱེས་ཞེས་པ་དང་ཅི་མི་མཚུངས། ཡང་ན་མཁས་དབང་ནམ་མཁའི་ནོར་བུའི་ཞང་བོན་ལོ་རྒྱུས་ཏི་སེའི་འོད་ལས་གོང་མའི་ཤཱཀྱའི་རྒྱལ་པོ་ཞལ་བཞུགས་དུས་དེར་བོད་ན་མི་མེད་རྗེས་སུ་སྤྲེའུ་སྒོམ་དང་སྲིན་མོ་འདུས་པ་ལས་བྱུང་བ་ཞེས་པ་རིག་པ་ཚད་མ་དང་འགལ་འདུག བོད་ཀྱི་ལོ་རྒྱུས་ལས་འཕྲོས་པའི་གཏམ་ནོར་བུའི་དོ་ཤལ་ལས་འཇིག་རྟེན་རིགས་ཅན་གསུམ་ལ་ཆོས་ཀྱི་འཁོར་ལོ་སྐོར་ཚེ། ཕྱག་ན་པདྨོས་གངས་ལྗོངས་འདུལ་བ་ཞལ་གྱིས་བཞེས་གང་དྲིན་ཆེ་ཡང་། དཀར་ནག་རྒྱ་དང་ཞང་ཞུང་ཀུན་ཏུ་ཤེས་རིག་དེ་ཙམ་རྒྱས་པའི་དུས། བོད་ཀྱི་སྤྲེའུ་རྒན་རྔ་མ་མ་ཆད་རྗེས་སུ་ལུས་པ་ཅི་ཡིན་ནམ་གསུངས་སོ།། ༣ གྲུབ་མཐའི་རྒྱལ་པོ་སངས་རྒྱས་གཡུང་དྲུང་བོན་ལུགས་ལ་འགྲོ་བ་མི་གདོད་མར་ཇི་ལྟར་འབྱུང་ཚུལ་ནི་ཀུན་མཁྱེན་ཤར་རྫའི་ལེགས་བཤད་མཛོད་དང་སངས་རྒྱས་གཤེན་རབ་མི་བོའི་བཀའ་ནས་མདོར་བསྡུས་ཙམ་དྲང་ན།དང་པོར་འོད་གསལ་གྱི་ལྷ་བསོད་ནམས་ཟད་པ་གཅིག འདོད་པའི་ཉོན་མོངས་སྐྱེས་ཀྱང་། བསམ་གཏན་གྱི་རྟེན་དང་མ་བྲལ་བར། རང་འོད་འདོམ་གང་དང་བཅས་ནས་དོག་ལ་བབས། ཡང་དེ་དང་འདྲ་བའི་ལྷ་གཅིག་བབས་ནས་ཁོང་གཉིས་ཀྱིས་བུ་ཞིག་ཡོད་ན་སྙམ་དུ་ཕན་ཚུན་ཡིད་འཕྲེང་བ་ལས་བུ་གཅིག་རྫུས་ཏེ་སྐྱེས། དེ་ནས་དེ་དག་ལས་མང་དུ་འཕེལ། ས་བཅུད་ཀུན་གྱི་སྟེང་དུ་སྤྲིས་མའི་ཚུལ་དུ་ཆགས་པ།རོ་སྤྲང་རྩི་ལྟར་མངར་བ་རོལ་པས་འོད་ཇེ་ཆུང་ལུས་ཀྱང་ཇེ་ལྕི་སོང་བས་མཐར་མུན་ནག་ཏུ་གྱུར་པར་བདེ་གཤེགས་ཀྱི་ཐུགས་རྗེ་དང་སེམས་ཅན་ལས་ཀྱི་དབང་གིས་མུན་སེལ་གྱི་ཉི་མ་དུས་དེ་ནས་བྱུང་བ། དེ་ནས་འཚོ་བ་དང་ཐོག་མའི་རྒྱལ་པོ་གཙུག་ཁྲི་བཙན་པོ་སྐོས་རྒྱུ་དག་རིམ་པ་བཞིན་ཡར་རྒྱས་སུ་བྱུང་བ་ནི་ལེགས་བཤད་མཛོད་ནང་ལེགས་པར་ཡོད་པས་ཚང་མའི་སྤྱན་གྱིས་གཟིགས་ན་འདིར་རྒྱས་པར་མི་བཀོད་དོ།།དེ་ཡང་མང་བཀུར་རྒྱལ་པོའམ་གཙུག་ཁྲི་བཙན་པོ་ཚེ་ལོ་འབུམ་དང་བརྒྱད་ཁྲིའི་མཚམས་སུ་བྱུང་བ་ནི་རྩ་འགྲེལ་ཉི་ཟེར་སྒྲོན་མ་ལས་ཡོད་པར་གསུངས་འདུག
ཡབ་སངས་པོ་དང་ཡུམ་ཆུ་ལྕམ་གཉིས་འཚོས་པ་ལས་སྲས་ཕོ་དགུ་མོ་དགུ་དང་བཅོ་བརྒྱད་འཁྲུངས།
སྲས་དགུའི་གཅེན་པོ་སྲིད་རྗེ་འབྲང་དཀར་དང་ལྷ་ཟ་ངང་གྲགས་མ་གཉིས་འཚོས་པ་ལས་རྒྱུན་མ་ཆད་པ་རིམ་པ་མང་པོའི་རྗེས་མང་བཀུར་རྒྱལ་པོ་བྱུང་། རང་གི་འདོད་ཚུལ་ལྟར་ལེགས་བཤད་མཛོད་ནང་ཡོད་པས་དེར་འཛིན་ན་འགྲིག་གི་བསམ། ཅིའི་ཕྱིར་ཞེ་ན། ལེགས་བཤད་མཛོད་ཀྱི་ནང་བཅུད་གྲོལ་ཚུལ་སྐབས་འགྲོ་བ་མི་ཐོག་མར་བྱུང་ཚུལ་ཐོས་ཆུང་བདག་གིས་བརྟག་དཔྱད་ཅུང་ཙམ་བྱས་ན་རིག་པ་ཚད་མའམ་ནང་བའི་ཆོས་ལུགས་ནས་གྲུབ་པའི་རིག་པ་ཚད་མ་གང་ལ་དང་བློ་དམན་བདག་གིས་དཔྱད་མདོག་ན་འགལ་བ་མེད་ཀི་སྙམ། སྤྱིར་ལོ་རྒྱུས་གང་དང་གང་ལ་ཞིབ་འཇུག་ལེགས་པར་བྱས་སྐབས་རང་ལྟར་དད་ཀྱང་ཆགས་སྡང་གི་ཕྱོགས་སུ་མ་ལྷུང་ན་གོམས་པ་འགྲོ་ཡང་སྲིད་ལ། དེས་མཐར་ཐུག་དོན་དངོས་གནས་པ་སྒྲུབ་ནུས་སེམས དེ་ཡང་རྗེའི་ཚད་མ་ལས། རང་ལྟ་ལ་མི་ཆགས་ཤིང་གཞན་ལྟ་ལ་མི་སྡང་བའི་སྒོ་ནས་གྲུབ་མཐའི་རྣམ་བཞག་བྱེད་པ་དེ་ནི་ཤེས་རབ་སྐྱེ་བའི་རྒྱུ་དང་དག་སྣང་སྦྱོང་བའི་ཐབས་ཁྱད་པར་ཅན་ཡིན་པས་དམ་པའི་ལུགས་སུ་འདོད་དོ།། ཞེས་གསུངས་སོ།། འོན་ཀྱང་འགྲོ་བ་མི་འདིའི་བྱུང་ཁུངས་བདག་འདྲའི་བློ་དམན་ཐོས་རྒྱ་ཆུང་བའི་རྟོགས་བྱ་མ་ཡིན་པས་དཔྱོད་ལྡན་དང་ཤེས་རབ་མངའ་བ་རྣམས་ཀྱིས་བརྟག་པར་མཛོད།
