དགེ་ཆོསvsསེང་རྡོར།
རྒྱལ་ཁམས་རིག་པས་བསྐོར་བའི་དགེ་ཆོས་ལ།།
མི་ཚེ་གཡེང་ལ་ཟད་པའི་སེང་རྡོར་གྱིས།།
རྨི་ལམ་སྒྱུ་མའི་ཞིང་ནས་འགྲན་རྒྱུ་ཟེར།།
གཙང་བོ་ཡར་ལ་བཞུར་བའི་ཉེན་ཁ་འདུག།
མདོ་རྒྱུད་ཐུགས་སུ་ཆུད་པའི་དགེ་ཆོས་ལ།།
རིག་པའི་འགྲོ་ལུགས་དབེན་པའི་སེང་རྡོར་གྱིས།།
ཁ་ཕོ་སྟོང་བ་ཞིག་གིས་འགྲན་རྒྱུ་ཟེར།།
ཉི་ཟླ་དབྱིངས་ནས་ཡལ་བའི་ཉེན་ཁ་འདུག།
སྐུ་ཚེ་རིགས་ལ་བཏང་བའི་དགེ་ཆོས་ལ།།
ཚོང་མོའི་སྐུབ་ལ་སྣོམ་པའི་སེང་རྡོར་གྱིས།།
ཐབ་ཀའི་མེ་དྲོད་རྩིབ་ནས་འགྲན་རྒྱུ་ཟེར།།
གནམ་ས་སྟེང་འོག་བསྒྱུར་བའི་ཉེན་ཁ་འདུག།
སྐད་རིགས་ཀུན་ལ་བྱང་བའི་དགེ་ཆོས་ལ།།
ཕ་ལོའི་སྐད་ངག་ཙམ་གྱི་སེང་རྡོར་གྱིས།།
རང་སྣང་བཙན་པོ་ཞིག་གིས་འགྲན་རྒྱུ་ཟེར།།
སང་ཉིན་གོ་ལ་འགུལ་བའི་ཉེན་ཁ་འདུག།
རྒྱལ་དར་ཕྱག་ཏུ་ཐོགས་པའི་དགེ་ཆོས་ལ།།
དོར་ཁ་ལག་ཏུ་བཟུང་བའི་སེང་རྡོར་གྱིས།།
གཅིན་པ་བཏང་འཕྲོ་བཅད་ནས་འགྲན་རྒྱུ་ཟེར།།
རི་བོ་རླུང་གིས་སྤུར་བའི་ཉེན་ཁ་འདུག།
རིགས་ཀྱི་ཞེན་པ་འཁྲི་སའི་དགེ་ཆོས་ལ།།
ཕྲུག་གུའི་ཨ་ཕ་ཙམ་གྱི་སེང་རྡོར་གྱིས།།
ནུབ་ཟས་ཁོག་ཏུ་ཐོན་རྗེས་འགྲན་རྒྱུ་ཟེར།།
མཚོ་མོ་མེ་རུ་འགྱུར་བའི་ཉེན་ཁ་འདུག།
ཕྱག་རྗེས་རིགས་ལ་བཞེངས་པའི་དམ་པ་སྟེ།།
སྙན་གྲགས་གཞན་ལས་འཕགས་པའི་མཁས་པ་འང་།།
རུས་པ་གསེར་དུ་གྱུར་བའི་དགེ་ཆོས་ལ།།
སེང་རྡོར་གྲིབ་མའི་ཟུར་ཁ་མ་ཁེལ་རོགས།།
ཁྱོད་ཀྱི་ལུས་ལ་ཡོད་པའི་ནོམ་པ་དེ།།
ཁྱོད་ཀྱི་སྙིང་ལ་ཉར་བའི་ཤེས་ཡོན་དེ།།
ཚིག་རྩལ་སྙན་པོ་ཞིག་གི་འོད་ཟེར་ཙམ།།
དགེ་ཆོས་དཔའ་བོའི་ཕྱག་རྗེས་གང་ནས་འགྲན།།
དགེ་ཆོས་མཁས་པ་སྤུན་ཟླ་མ་ཡིན་ཏེ།།
སེང་རྡོར་རྒན་པོ་དགྲ་བོ་མ་ཡིན་མོད།།
གནམ་དང་ས་ཡི་བར་ཐག་རིང་མོ་འདི།
ཚོར་བ་འཁྱམ་པོས་གཞན་ལ་གླེང་བ་ཡིན།།
2015/6/19 ནུབ་མོར་བྲིས།
